Cróniques dende Bonna na Xermania.

Resquemó-yos a dalgunos la rempuesta del Tribunal Constitucional sobro'l casu del xurista Xurde Blanco. Agora'l camín va siguir hasta Estrasburgu. Norabona pol enfotu y xacíu puestos na llucha reivindicativa a elli y a Xuristes pol Asturianu.

Que tou'l xaréu se deba a la denuncia d'un particular tamién muestra qu'organizativamente nun andamos mui finos. Somos más de manifestación y comunicáu que de restolar per ónde se-yos pue meter mano a los d'enriba.

La rempuesta de la Sra. Migoya pura hipocresía. Lo manifestao por Consuelo Vega güel a rancio y retorcío que tira p'atrás.

Dende'l BA súmense a felicitaciones y crítiques. Pero pudieren facer abondo más en toos estos años y agora mesmo. Y nun lo fixeron nin lo tan faciendo.

Contrasta que la direición d'una institución académica qu'enxamás tuvo pelos na llingua pa criticar a les sucesives persones qu'ocuparon la oficina de política llingüística anden con tantu guante blancu y miramientu cola actual responsable d'esa estaya. ¿Por qué?.

Tou esti asuntu sirvió pa que'l tema asomase una migayina más allá de les nueses llendes. Que s'enteren fuera de lo que pasa equí siempres ye importante. Anque tamién ye cierto que los represores traten de que se presente distorsionao y tienen medios a esgaya pa ello.

Esto de los casos de represión de los drechos llingüísticos ye un viaxe con paraes en forma. Va siguir porque non tolos ciudadanos tán dispuestos a enartase en procesos como los d'esti xurista y los que manden sábenlo. A ver cuála noticia represiva ye la siguiente.

Dende ayeri podemos güeyar un debate bien gafu que naz d'un artículu colgáu nun blog na rede.

Partidarios y contrarios a la xuntanza vienen solmenándose per aciu d'ello. Pero ún de los puntos de partida de tou l'enguedeyu ye artificial: la supuesta incompatibilidá del trabayu nacionaliegu de base con guetar aliances pa entrar na Xunta Xeneral al traviés d'una xuntanza.

Y la cuestión ye qu'esi fiensu de partida ye un erru. Nun se da incompatibilidá nenguna. A poco que nos paremos a reflexonar vamos pescanciar que se pue realizar guapamente un trabayu de base y nos conceyos y al empar facer los movimientos y reuniones afayadices p'algamar una candidatura unitaria nacionaliega/asturianista de cara a les prósimes eleiciones autonómiques.

Por ello, atalanto que l'alderique ta viciáu de mano porque ún de los puntos fundamentales nos que se sofita ye artificial y tovía nengún de los que lu caltienen demostró que les dos cuestiones anteriores seyan incompatibles.

Poques selmanes enantes d'ocupar el so escañu, el flamante diputáu Roberto Colunga declaró alto y claro que diba usar l'asturianu na Xunta Xeneral.

Agora acabamos de ver una intervención de so onde incumple lo declarao. Y la solombra de la utilización política de la llingua asturiana pa otros fines peñera penriba nosotros.

Cuando s'ocupen cargos relacionaos col asturianu y cuando se dedica ún a la política y a la reivindicación llingüística lo menos que se pue facer ye deprender esti idioma y usalu.

Porque si nun se fai'l dañu ta nidiu. Delantre los demás miembros del parllamentu y delantre la sociedá, los que reivindicamos un sitiu dignu pa esti idioma quedamos como unos ensin chapeta que nun nos aplicamos a nosotros lo que demandamos a los demás.

A los problemes que yá tien, que son abondos, la llingua asturiana hai que-y amestar otru más. El de la xente que la utiliza como comodín pa otru tipu de reivindicaciones, pero qu'a la primera de cambiu amuesa'l so pocu interés por ella.

La meyor manera de lluchar por una llingua ye escomencipaiar por usala, y si ye nun parllamentu muncho meyor pola trescendencia y sonadía qu'esti fechu algama.

Prometer una cosa y nun la cumplir ye adientrase pel camín de la mentira. Y de la xente qu'actúa asina hai que tomar bona nota porque nun son de fiar. Independientemente de la ideoloxía que diga tener o del partíu al que pertenezan.

La semeya de la comunicación del refugu por parte de la Conceyalía de Cultura del Ayuntamientu de Llanera de ceder pa un actu la Casa de Cultura a la organización FAI ta espublicada n'internet y nun tien desperdiciu.

D'un llau na comunicación déxase claro qu'entienden perfeutamente la solicitú de la citada organización y polo tanto nun hai nenguna torga por nun pescanciar el testu radactáu n'asturianu.

D'otru llau sollíñase de manera que rescample la petición de qu'esa solicitú la redauten en castellanu. Pero ensin añadir un res de por qué tienen que camudar de llingua, pues como queda dicho enantes, na conceyalía entendieron dafechu'l testu que se-yos presentare n'asturianu.

Queda entós como única esplicación de la negativa, una remexu de zuna hacia la llingua asturiana, un empeñu, arrémente por nun querer saber nada d'esta llingua. Y con una postura qu'entra no chulesco.

Pero tamos falando d'una institución asturiana, d'un ayuntamientu y d'unos políticos que se financien col dineru de los asturianos, incluyíos los que falen asturianu.

Asina que dalgo fiede a antidemocrático y antiasturiano nesi ayuntamientu y concretamente na Conceyalía de Cultura. Como s'avecina l'antroxu, bien podríen repartir ente los antroxaos una mázcara como la de la semeya pa protexese de los arrecendores desagradables que salen d'esa Ca Conceyu.

Ta acabante nacer una organización con sitiu n'internet llamada "Atropar la cai". Lleendo los sos finxos ideolóxicos remanez que dalgo ta entamando a cambiar nel nacionalismu d'izquierda asturianu.

Esti grupu alluga la espirica identitaria a la tiesta de les sos reivindicaciones. Concretamente, cinca la historia asturiana desaniciando los complexos que faen a bien de nacionalistes querer dexar nel escaezu lo anterior a 1.808 o hasta a 1.934.

Decátense de daqué que tienen nidio nos demás nacionalismos dayures, menos nel asturianu. Que lo identitario ye l'envoltoriu que va preñáu de reivindicaciones sociales, ecolóxiques, económiques, etc. Equí hai xente empeñao en facelo al revés. Pónense d'envoltoriu eses reivindicaciones y dempués fálase de la cuestión identitaria asturiana.

Y el resultáu d'esto cabero yá se ve. La xente tien una imaxen de los nacionalistes como de xente que reivindica lo mesmo que cualquier otra organización d'izquierda. Si acasu, emplegando la llingua asturiana como diferencia. Pero l'emplegu de la llingua nun afata, per se, a los que lo faen como nacionalistes asturianos. Porque entós, si mañana-y diere al PP (oxalá) por usala darréu sedríen nacionalistes llariegos, y eso ye una babayada.

Simplemente con fixase lo que más-yos repuna a los socialistes que gobiernen n'Asturies, vese per onde hai qu'empobinar la llucha. Ellos puen almitir reivindicaciones sociales, anque al final nun les lleven alantre. Pero coles reivindicaciones identitaries amuesen la "tolerancia cero". Quieren cortales pela freba. Esñizales y facer lo que seya pa que nun puedan sirvir de formientu a eso que tanto tarrecen: que xorreza n'Asturies un "nacionalismu".

El camín pel qu'empobinar tendría de tar bien claru a estes altures. A ver.

Apilucaes d'una entrevista en Asturnews a Xaviel Vilareyo:

1) [Dame tristura tol desdén qu'hai n'Asturies a tolo referente al Reinu d'Asturies. Yá que si Asturies ye asturies ye gracies a aquel estáu medieval independiente.]

2) [Non sólo la llingua sinón toa asturies como país s'enfrenta a la muerte. Dende Alfonsu III p'acá too son recesiones y amenorgamientos. Nel sieglu XI Navarra conquístanos Tresmiera. Nel XII Castiella quítanos la mitá d'Asturies. En 1.835 Galicia quítanos Fonsagrada, Suarna y la Ribeira asturiana de Piquín nel ríu Eo y Lleón quítanos Sayambre y Valdeón y agora un cachu del puertu de montaña. Per otru llau queríen quitanos un monte comunal en Cabrales. Y los nacionalistes asturianos de la provincia d'Uviéu anden debatiendo si hai qu'apoyar la revolución cubana o china.]

Tampoco nun me cayó embaxo esti comentariu d'un llector:

[Según tolos autores la muerte del conde Gonzalo Peláez prodúxose a comienzos de la primavera cuando venía a siguir la so llucha n'Asturies col so exércitu y una ayuda militar portuguesa. Enxamás se fixo recordatoriu nin cabudañu nengún nesa época del añu al respectu. Propóngo-y entamar por primer vez pa esta primavera o pa la siguiente un actu n'alcordanza d'esti personaxe fundamental pa entender la historia medieval asturiana.]
(Un ciudadanu asturianu)

Pañada d'una entrevista d'apocayá n'Aruelu.com al xurista Xurde Blanco:

[Ye positivu l'alderique (de la xuntanza)y más entá porque ta entamáu per xente independiente, preparao y decente.
¿Va ser granible?. Pa esta nun creo porque pa ello fai falta una gran dosis de xacíu y arrogancia en tolos requexucos nos que se dixebra l'asturianismu políticu y nenyuri ponen traces d'ello. Amás hai muncha xente na primera fila de cada requexucu que sobren. Sobren na primera fila-non na xera, na que toos tienen sitiu y estaya-, pente otros, los qu'apostaron pola collaboración col gobiernu Areces; los qu'abulten trabayar pal enemigu porque lleven décades nun faciendo más que desaniciar cualquier intentu de poner cabeza na casa llocos que de cuantayá vien siendo l'asturianismu políticu; estorben los sovencionaos crónicos; los estremistes de picu (que non de pala) tamién estorben...
El cambéu cualitavitu nel movimientu políticu asturianista va dase cuando les xeneraciones nueves maduren, pero eso quier tiempu. Cuando llegue, la política a facer tien de ser radicalmente asturiana y socialmente antidemagóxica.
Con too, per agora yo nun veo otru llabor a curtiu plazu que siguir iguando reductos de sociedá civil capaces d'aguantar frente al poder colonial y, al empar, caltener y tresmitir a les xeneraciones vinientes valores de dignidá, decencia y ciñu pa colo nueso. Pero si la estaya política s'encadarma ellí voi tar cola gabita pa lo que faiga falta.]

Comentariu pañáu del artículu entituláu "IU y los cargos públicos" del blogue "Histories de Truyés y otros llares":

[Nun sé si IU esboroñará dafechu o aguantará entá'l tirón calteniendo dalgún diputáu a la vuelta d'añu y picu. Lo que paez cada vegada más claro ye que ta esfaraguyándose como fuerza política autónoma. Anguaño ye un simple apéndiz del PSOE como confirmen los fechos. Hai munchayá que los nacionalistes nun tienen un marcu tan afayadizu pa intentar entrar na Xunta Xeneral. Si nun aprovechen la ocasión yá lo fadrán formaciones como UPyD. L'únicu camín que-yos queda a los nacionalistes pa intentar esa entrada ye empobinar a una xuntanza, anque seya nun primer momentu de mena estratéxica. Pero ye que política ensin estratexa ye como campana ensin mayuelu. Lo que pasa ye que repasando la historia del nacionalismu asturianu y agüeyando la situación d'enllamuergamientu en que s'alcuentra actualmente, nun ye pa enfotase en que cambien les coses y los nacionalistes sepan aprovechar esta situación histórica. Si nun lo faen yá puen despidise de pintar dalgo na política asturiana por munchísimos años y bastantes llexislatures.]
(Escéuticu)

Acabo de lleer esti comentariu na bitácora del "Circulu Lliberal" tocántenes a la noticia del usu de la llingua asturiana pol nuevu arzobispu na so toma de posesión y l'escasu ecu en medios asturianistes:

[Una cosa ye nun ser creyente católicu y otra nun reconocer el pesu que la ilesia católica tien na nuestra sociedá. Pa qu'una llingua seya normal tien qu'entrar en tolos ámbitos y instituciones d'una sociedá. Polo tanto, que'l nuevu arzobispu fixere usu del asturianu na so toma de posesión habría ser reseñable y bien acoyío por cualquier persona enfotada nel futuru d'esti idioma. Pero pa ello ye mester que se dean dos condiciones: la primera, tener el xacíu y sentíu común pa ver lo evidente; la segunda, dexar los prexuicios escaecíos nel sobráu de la memoria.]
(Básico y evidente)

El Gobiernu Asturianu refuga dar más perres pa que sigan les escavaciones arqueolóxiques en La Carisa, tres varies campañes dedicaes a esta xera.

Una decisión a la que s'oponen los ayuntamientos de los conceyos d'Ayer y L.lena.

La postura sofítase na paranoia antiasturiana que dende'l poder allugáu n'Asturies tienen a cualisquier tema que cinque lo identitario del nuesu país.

Cualquier descubrimientu que nun se pueda encaxar alrodiu de los finxos romanos o español nun interesa. Pa les mentes enfermices que nos gobiernen, cualisquier niciu qu'afonde na conocencia de lo que somos y d'aú venimos ye una Guaxa qu'esglamia les esencies patries españoles.

Convién amosar nesti momentu'l nuesu apoyu a los conceyos afeutaos y garrar esti tema como una reivindicación cultural perimportante de los coleutivos asturianistes.

Y encamentar a los gobernantes qu'anguaño hai melecinatos perbonos pa tratar esti tipu de pantasmes mentales como los que los afalen.